MORTE ‘E FAMME



Dint”a ‘na casa n’ommo sta murenno,

se guarda attuorno pe’ cercà cunforte.

Disperata, ‘a mugliera sta chiagnenno,

nun po’ fa niente: nun se vence ‘a morte.



‘E quatte figlie, ancora piccerille,

stanno ‘int”a casa d”a signora affianco.

All’intrasatto sentono ‘nu strille:

‘a signora capisce e... se fa janca.



‘O juorno appriesso, doppo ‘o funerale,

arriva ‘nu pranzetto, overo ‘e lusso:

maccarune a rraù, carne ‘e maiale,

formaggio, frutta e…’nu fiasco ‘e russo.



P”e guaglione, ‘stu juorno è cchiù ‘e ‘na festa;

a chella età pe’ primmo sta ‘appetito…

‘A mamma ‘e gguarda: ormai, sul’essa resta.

Che croce che l’aspetta ‘int’a ‘sta vita!



‘O cchiù guaglione, doppo ch”a mangiato,

guardanno ‘nfaccia ‘e frate, tuorne, tuorne:

« Oj ma’ - dice (e p”a mamma è ‘na mazzata) -

pecché papà nun more tutt”e juorne?



Carmine Volpicelli

LACREME NAPULITANE

A Libero Bovio

(26 Maggio 1942)



È Primmavera o nun è Primmavera?

nun se sente p”e strate: «Bellu sciore...».

Chesta jurnata scura cchiù d”a sera

n’alba ‘e tristezza ha miso dint”o core.



Nun saglie ‘a voce: «‘E ffravule ‘e ciardino! »

‘O pianino nun sona: « Quanta rose »

Pare ca tutto dorme a suonno chino,

pare ca songhe ‘e neve tutt”e ccose.



Comm’a ‘na vota ncoppe addu « Pallino »,

nisciuna mano ‘e ccorde vò tentà,

‘a pusteggia s’astipa ‘o mandulino:

ogge ‘e vvoche nun sanno cchiù cantà.



Cchiù cupo e niro è addeventato ‘o mare

‘e vvarchette scuntente nun so’ asciute…

A Pusilleco tutt”e marenare

se fanno ‘a Croce pallide e avvelute.



E cchiagneno ‘e mmaeste d”o Mercato,

chiagneno ‘e guappe ‘e vascio ‘a Sanità:

-Sanghe de ddiece!...- È muorto ‘on Liberato!...

E mo ‘a Canzone comme fa a campà?!...



Giuseppe Carullo

NATALE LUNTANO



Pe’ me sarria Natale si putesse

turna’ pe’ sempe dint”a casa mia,

sentirme attuorno attuorno sempe ‘o stesso

profumo ‘e cose care e po’ p”a via,



‘ncuntranneme cu ‘a gente ‘e stu Paese,

mme vularria scurdà ch’esiste ‘o male,

vurrìa pe’ chisti iuorne ‘sta pretesa,

‘stu suonno ca può ffà sulo a Natale.



Pecché ‘e Natale tutto se cunfonne,

te pare overo chello ca è buscìa,

te pare ‘e campà ‘int”a n’atu munno,

te siente attuorno tutta n’armunia.



E ‘int”a ‘stu suonno mme ce abbandunasse

pe’ me gudé sti feste alleramente

e tutt”e ccose brutte m”e scurdasse

lassanno sulo ‘o bello dint”a mente.



Ma stò luntano e me se astregne ‘o core

e ‘a luntananza te distrugge ‘e suonne,

‘e juorne tutt’eguale, eguale ll’ore,

è overo ca è Natale? M’addimanno!



Lina Piedimonte Celentano

‘A ROSA

Mese d’Abbrile! ch’aria ‘mbarzamata,

se sente attuorno, ‘addore d”e viole;

ca pure si chiuvesse , ‘sta jurnata,

tutta ‘sta casa, fosse chiena ‘e sole!



Ogge, nasciste tu, rosa affatata,

‘nzieme cu ‘a primmavera, tutta ‘nfiore,

ch”a tutte quante, è tanto suspirata,

pecché porta speranze, fede e ammore.



E a te, ca stive atturniata ‘e spine,

‘a primavera te dicette: -Viene,

te voglio fa regina d”e ciardine,

fa’ allero a chi te coglie e te vo’ bene!



E chillu ciardeniero affurtunato,

songh’io, ch”a cugliette cu sta mano;

e ‘a guardo, ‘a curo e ll’arracquo c”o sciato,

cu ‘a passione ‘e ‘nu napulitano!



Pecché, pe’ me,è ‘na cosa preziosa,

ca ll’haggio dato vita, bene e ammore,

e niente ‘a po’ cagnà, pecché sta rosa…

tene pe’ testulella chistu core!



Armando Cenerazzo

SPASELLE ‘ARGIENTO

Nu mare ‘e sole! ‘E vvarche, ‘e piscature

tirano ‘a rezza a buordo: ‘a pesca è d’oro!

‘O ssanno e so’ cuntente ‘e vvoce lloro

ca ‘o ppane è assicurato p”e ccriature.



E cantano sudanno ‘e cuntentezza;

‘o mare ‘e mmette ncore ‘a tenerezza…

L’argiento friccechéa: arriva ‘a rezza

c”o beneficio e ‘addore d”a freschezza!



Quanno ‘int”a varca trase ‘a rezza chiena,

se fanno ‘a croce a nnomme d”o Signore,

‘e piscature, e p’abbunnanza e ammore,

po’ portano sti pisce nterr’arena.



Pare na festa cu ‘e spaselle ‘argiento

spase pe’ terra cu l’addore ‘e mare.

Cu poche lire tutte so’ cuntente:

famiglie ‘e piscature e tanta gente.



Po’ tutto se riduce comme a sempe

p”e piscature...cu ‘a speranza ncore.

E so’ felice, campano p’ammore,

pregano a Dio ca fanno ‘e buone tiempe.



Salvatore Cerino

CHELLA VOCCA

E fuje pe’ chella vocca e chella voce

ca lle cercaie nu vaso a pprimma sera:

Abbrile, attuorno a nuje, sincero e ddoce,

spanneva n’aria fresca ’e primavera.



Gesù, nun ce l’avesse maje cercato.

Comm”a na lampa ’e fuoco se facette.

Me l’anniaje tre vvote. E ’i ’ntussecato,

senza guardarla ‘nfaccia, me ne iette.



E resistette cchiù ’e na semmana…

Nun saccio comme nun ascette pazzo.

Ma, doppo ’e smanie ’e na jurnata sana,

‘a sera me fermaje nnanze ’o palazzo.



‘O guardaporta me tenette mente,

cu ’e mmane dint”e sacche d”o cappotto,

capuzziaie nu poco... e ‘i, lentamente

stevo vutanno ‘e spalle, quanno ‘e botto,



me sentette appuià, leggia e aggarbata,

na mano ‘ncopp”o cuollo. E mmiez”a via,

chella vocca addurosa ‘e marmellata,

restaie ‘cullata ‘ncopp”a vocca mia.



Raffaele Chiurazzi